झुकेको हिमाल

झुकेको हिमाल
विधा : गजल
गजलकार : घमराज लुइँटेल
प्रकाशक : अनाममण्डली
_________________

सागर थियो कुलो बनी सुकेको छ देश
नेपालीकै मुटुभित्र दुखेको छ देश

ढुङ्गो-माटो देखाउँदै नेपाल भन्छन् कोही
यथार्थमा लजाएर लुकेको छ देश

गाँस-वास, कपास छैन, रक्षा पनि छैन
लोकतन्त्रका फोस्रा भाषण भुकेको छ देश

थाप्लामाथि पैतालाका सलामीको मार
शिरको टोपी, हिमालसँगै झुकेको छ देश

कहाँ थिए, कहाँ पुगे छिमेकीलाई हेर
पाइलैपिच्छे मोडमोडमा चुकेको छ देश !
_____________________________

मेरा मित्र घमराजजीलाई
गजल ~ यात्राका लागि हार्दिक शुभ कामना !